"Инклюзивті орта: мұғалім, ата-ана және оқушының өзара әрекеттестігі" қалалық семинар

2026 жылғы 17 сәуірде Әди Шәріпов атындағы №16 мектеп-гимназиясында «Инклюзивті орта: мұғалім, ата-ана және оқушының өзара әрекеттестігі» тақырыбында қалалық семинар өтті. Шара жоғары ұйымдастырушылық деңгейде ұйымдастырылды.

Семинардың негізгі мақсаты — ерекше білім беру қажеттіліктері бар балаларды оқыту мен қолдауда мұғалім, ата-ана және оқушы арасындағы тиімді байланысты орнату, тәжірибе алмасу және инклюзивті мәдениетті дамытудың заманауи тәсілдерін талқылау.

Шара барысында қатысушылар келесі негізгі бағыттарды талқылады:

• Мұғалім мен ата-ана серіктестігінің баланың әлеуметтенуіне әсері;

• Оқушыларды мектеп ортасына психологиялық бейімдеудің тиімді жолдары;

• Инклюзивті білім беру саласындағы озық тәжірибелер мен практикалық кейстер.

Семинарға Алматы қаласы Білім берудегі жаңа технологиялардың ғылыми-әдістемелік орталығының өкілдері, жоғары оқу орындарының мамандары, білім беру ұйымдарының басшылары, педагог-психологтар, логопедтер, арнайы педагогтар және ата-аналар қауымдастығы қатысты. Қатысушылардың жалпы саны 100-ге жуық адамды құрады.

Айта кететін жайт, 2022 жылдан бастап мектепте инклюзивті сыныптар жұмыс істейді. Қазіргі уақытта 1-9 сынып аралығындағы 60 оқушы жеке, бейімделген және жалпы білім беретін бағдарламалар бойынша білім алуда. Сондай-ақ, мектеп базасында Алмалы ауданының мектептеріне арналған құзыреттілік орталығы құрылған, ол жүйелі тәжірибе алмасу алаңы ретінде қызмет етеді.

Бұл семинар инклюзивті білім беруді дамыту жолындағы маңызды қадам болып, кәсіби өсу мен ынтымақтастық үшін жаңа мүмкіндіктер ашты.